Ùczãstnicë kùrsu kaszëbsczégò jãzëka, jaczi òrganizëje Kaszëbsczé Fòrum Kùlturë w Gdinie, pòjachelë ze swòjim szkólnym Darkã Majkòwsczim na edukacjową wanogã.
Zaczãlë jã òd Spòdleczny Szkòłë w Tëchómiu. Ji direktórka i równoczasno metodicznô dorôdczka kaszëbsczégò jãzëka Elżbiéta Prëczkòwskô òpòwiedza ò robòce w prowadzony przez niã môlu, òsoblëwie ò nôùce kaszëbsczégò jãzëka i rozmajitëch dzejaniach, co promùją w szkòle kaszëbiznã. Kôrbiła téż ò czekawëch materiałach, jaczé są na starnie https://www.akademiakaszubska.com/.
Pòsobnym pùnktã na karce wanodżi bëło Żukòwò i tameczné pòklôsztorné bùdinczi, jaczich historiô je sparłãczonô z sostrama norbertankama, chtërne przëjachałë tuwò ju w XIII w. Najim prowadnikã w nym môlu béł Eùgeniusz Prëczkòwsczi, historik, aùtór wiele ksążków i filmów ò Kaszëbach. Rzekł ò historii Żukòwa i całëch Kaszëb, wspòminôł lëdzy zasłëżonëch dlô najich strón i pòkazywôł wôrtné zabëtczi.
Pózni ùczãstnicë wanodżi jachelë do Szëmôłda, dze w snôżi bibliotece pòtkelë sã z młodima kaszëbsczima dzejarzama i szkólnyma: Justiną Pranszką – aùtórką czekawëch pòwiôstków dlô dzôtk – i Gracjanã Fópką, gazétnikã i badérą historii swòjégò òkòlô, òsoblëwie Dolmierza. Òbgôdka z nima bëła fùl pòzytiwny energii, a tikała kaszëbsczi lëteraturë, piastowaniô jãzëka, tradicji i kómpleksów, jaczé wcyg są żëwé przédno w starszich pòkòleniach (nié blós w Szëmôłdze i Gdinie).
Na kùńc direktórka Pùbliczny Biblioteczi Gminë Szëmôłd Iwóna Piastowskô òpòwiedzała ò tim, jak przëbôcziwóné są pòstacje kaszëbsczich pisarzów zrzeszonëch z szëmôłdzką zemią: Alojza Nôgla, Jana Piepczi, ks. Léòna Heyczi i Bòlesława Bòrka. Wspòmnãła ò kònkùrsach dlô dzecy i młodzëznë, ò wëdôwónëch ksążkach i jinëch ôrtach promòcji kaszëbsczégò ùtwórstwa. Pòkôzała téż pôrã placów, jaczé są we widzałim, nowòczasnym bùdinkù Samòrządowégò Centrum w Szëmôłdze, dze mô swój môl biblioteka.
Z całégò serca wiôldżé Bóg zapłac dlô wszëtczich, co òddelë swój czas dlô najégò kaszëbsczégò karna, a òsoblëwie direktór Pùbliczny Biblioteczi Gminë Szëmôłd Iwónie Piastowsczi!
Dark Majkòwsczi
Wanoga gdyńskich Kaszubów
Uczestnicy kursu języka kaszubskiego organizowanego przez Kaszubskie Forum Kultury w Gdyni pojechali ze swoim szkólnym Dariuszem Majkowskim na edukacyjną wycieczkę. Pierwszym jej punktem była Szkoła Podstawowa w Tuchomiu. Jej dyrektorka i jednocześnie doradczyni metodyczna języka kaszubskiego Elżbieta Pryczkowska opowiedziała o pracy w prowadzonej przez siebie placówce, zwłaszcza o nauce języka kaszubskiego i różnych działaniach promujących w szkole kaszubszczyznę. Mówiła także o ciekawych materiałach znajdujących się na stronie https://www.akademiakaszubska.com/.
Kolejnym punktem na mapie wanodżi było Żukowo i tamtejszy zespół poklasztorny, jakiego historia wiąże się z siostrami norbertankami, które pojawiły się tutaj już w XIII w. Grupę oprowadził po tym miejscu Eugeniusz Pryczkowski, historyk oraz autor wielu książek i filmów o Kaszubach. Przybliżał on historię Żukowa i całych Kaszub, wspominał ludzi zasłużonych dla naszego regionu i pokazywał cenne zabytki.
Następnie kursanci pojechali do Szemuda, gdzie w pięknej bibliotece spotkali się z młodymi działaczami i nauczycielami kaszubskimi: Justyną Pranszke – autorką interesujących opowiadań dla dzieci – oraz Gracjanem Fopkem, dziennikarzem i badaczem historii swoich okolic, zwłaszcza Donimierza. Rozmowa z nimi była pełna pozytywnych emocji, a dyskusja dotyczyła kaszubskiej literatury, pielęgnowania języka, tradycji oraz kompleksów, które wciąż są obecne zwłaszcza w starszych pokoleniach (nie tylko w Szemudzie i Gdyni).
Na zakończenie dyrektorka Biblioteki Publicznej Gminy Szemud Iwona Piastowska opowiedziała m.in. o sposobach przybliżania postaci kaszubskich pisarzy związanych z ziemią szemudzką: Alojzego Nagla, Jana Piepki, ks. Leona Heykego czy Bolesława Borka. Wspomniała o konkursach dla dzieci i młodzieży, o wydawanych książkach i innych formach promocji kaszubskiej twórczości. Pokazała także kilka miejsc znajdujących się w imponującym, nowoczesnym Centrum Samorządowym w Szemudzie, gdzie mieści się także biblioteka.
Serdecznie dziękujemy wszystkim, którzy poświęcili swój czas dla naszej kaszubskiej grupy, a szczególnie pani dyrektor Biblioteki Publicznej Gminy Szemud Iwonie Piastowskiej!
Darek Majkowski
